(poesia di B. Castagna)

‘ A  FESTA ‘E L’UVA

Taliaù, cchi ti nda para, c’è ‘nu certu movimentu

Ca si ‘a fannu ppè daveru, ppe ‘sa festa su cuntentu!

Cchi si dìcia, Carminuzzu, non m’u dici puru a mia?

Su’ curiusu ppemm’o  sacciu sinnò restu cc’a gulia!

Cchi si dìcia……cchi si dìcia…..Tu mi pari addormentatu….

Si nda parra a tutt’i, i parti, strati strati, a lu mercatu………..

Dintr’a ruga duva staiu  stamatina mi cuntaru

Ca ad ottobra fannu ‘e novu chidda festa a Catanzaro

Cchi ‘on facìanu ‘e tantu tempu, t’a ricordi puru tu…………

Fannu ‘e novu   ‘A FESTA ‘E L’UVA’ cchi ‘e tant’anni ‘on fannu cchiu.

Sull’onestu d’a famighhia, eu t’u giuru, ‘on sacciu nenta!

Mo cchi ‘u sacciu su’cuntentu… ma a cu fu cchi vinna a menta?

Mnah! Mi para l’abbocatu…… Si! Ferràagina, Peppinu,

cchi cci vinna ‘u virri virri sia da l’uva ca d’o vinu

e ccu d’iddu si iungiru Sergiu, Orlandu assem’a Pinu,

cci pensaru tutt’a notta…. Decidiru a lu matinu!

Cchi nda sacciu, Talianuzzu, tu ti pigghi troppi affanni,

l’importanta è ppemm’a fannu, e m’a fannu tutti l’anni!

Cchi bellezza, mo daveru, quasi quasi non ci crìu!

Ma appurasti quandu ‘a fannu?  Vogghiu propriu ppemm’a viu!

Dunca, para ca ‘sa festa, mi diciànu ‘i figghi mei,

ca cumincia iornu cincu e si fina iornu sei;

subb’o Corsu, ‘è Santu Roccu finu a chiazza Prefettura

si fa festa, canti e balli finu ‘a sira quandu scura.

Ahh! Ma allora è prpriu guala… fammi dira…statti quetu,

fannu  ‘e novu a festa ‘e l’uva comu tantu tempu arretu?

Finalmenta capiscìsti! Mi dassasti senza fiatu,

ava n’ua cchi nda parru e mi sentu già mbriacatu!

Propriu guala comu a tandu, ccu tant’uva ammenz’i chiani ?

Ti ricordi quantu carri, quantu balli cch’i pacchiani ?

E ‘i vitrini de’ putichi, ti ricordi quantu lussu,

chiini d’uva ccu nastrini, vinu iancu, vinu russu….

Cc’era ‘u premiu pp’a cchiù bella ed ognunu cci tenìa !

Cuncettina,  chiddu iornu, de pacchiana si vestìa,

si consava de ‘nu  latu ma si gusta strata strata

tutt’ì carri chiini d’uva acconzati pp’a sfilata!

Uva ianca, a minn’e vacca, ccu zibibbu, marvasìa….

Cu’ nd’arringa de ‘nu carru, cu’ s’a pigghia e si recria….

Balli, canti, fiaschi ‘e vinu, e ‘nta tuttu ‘su corteu

Cch’i bicchieri dintr’e mani…truzza tu ca truzzu eu……

Carminù, ma cchi bo’ dira……. Fannu tuttu ppè daveru ?

Certu !   Allora non mi cridi ?  Statti certu, su sinceru!

Dimmi ‘e novu, ca on capisciu,  n’atra vota fannu chissa ?

Si ‘on mi senti, si non cridi tutti si paroli mei.

Ed allora veni e vidi iornu cincu e iornu sei !!!!